بطاقة تعريف.....

صورتي
حين وقفت بباب التدوين فتش أحلامي الحراس أمروني أن أكتب يومي وأنثر ثنايا الاحساس أمروني أن أرسم فاصلتي بأخر بقايا الانفاس

الخميس، 19 فبراير 2009

الي يعجبك رخصه لوح نصه ؟!!!


السلام عليكم ...

مش عارفه نحس اني ليا هلبه معاش كتبت بالفلاقي ...ونحس ان الجذوري الليبيه الإنتقالية بتنقح عليا (مش عارفه تنقح شن دخلها باللهجه الليبيه).....

المهم وبما ان اليوم عطله ياسعدودي يامقدودي ....فقلت تيكت ايزي اليوم وخلينا في الساهل في الفلاقي يعني

واليوم خطر عليا انحمل برنامج ذو 196 ميجا وبشني ؟؟؟؟؟؟؟؟؟؟؟؟؟؟؟؟؟؟؟ بالمدار ؟؟

لكن درتها بكساحة الراس هو داير روحه تنبال..قتله بتغلبني في التبله تو نشوفوا ماديني مقوبعتلك نومك

(الدوا على المدار) ..فاليوم الصبح نضت بعمشي هههه.. اول حاجه درتها اني فتحت صفحة التحميل


ودرت بدء التحميل... الدوا هادي الساعه التسعه التسعه ونص ،،

وخليته البي يحمل (والدوا قاعده على المدار )..

دورة فاتت الواحد ف
اتت الإثنين فاتت الثلاثه وقعد يتمخطر في 150 ميجا ..

قتله باه مش قضية وراك وراك والزمن طويل ..والله فكرني في موضوع ميمي الي قبل الأخير ..

كانت حاطه الفيديو الي يقول فيه (يعني 40 ساعه دول الي حتحمل فيهم هما الي حيغيرو حياتك.).

ويقول فيها بإستخفاف قلت والله عنده حق ..

بعدين يكفي اني نحمل من حر مالي لا حد يقولي الرصيد كمل ولا جيجاتنا كملوا ،،

والله جدودنا كان يسمعوا بالكلام هذا يحطونا مضحكه ...جيجاتكم شني الي كملوا ...؟؟


المهم كمل تحميله مع الساعه 5:30 العشيه....وقاعد يدير في انستول من هداكا التاو....

مش قضيه، خطرها المثل الي يقول الي يعجبك رخصه لوح نصه ..

لأني شهقت لما قالولي عشره جنيه تفتحلك 24 ساعه ولمدة شهر

وقد ماحاولوا يخففوا من الصدمه النفسيه الي ممكن تجيني انهم يقولولي ..

راهو بطئ هلبه واني نقوللهم عادي ..

لكن توا صدقتهم لكن برضوا عادي المهم فيه البرنامج الي يستأنف وين ماينقطع الكونكشن!



***



على سيرة الشهقه من يومين طلعت اني واختي فخطمنا على محل الكنادر ..بصدفه جت عينا على بوتات قنينات والله

لكن شني؟ الواحد بخمسه جنيه ؟؟!!!!!!

اختي خلاص شبطت بناخذهم الزوز ..واني نقوللها كبري عقلك يابنت توا كان مافيهمش عله بتلقيهم بخمسه جنيه

قتلي عادي يمشوا حتى شهر ..قتلها في خاطري ايه غير اعبي ..

فاليوم من اول خطوه مشت فيها سمعت صوت إعععع شويه شبحت لوطا تلقاه فاتح لسانه ...

مسكينه شهقتها شهقه زي الشهقه الأولى لما شبحت السعر غير هادي الأوبزت بتعها ..

قتلها تستاهلي مش قتلك >>الي يعجبك رخصه لوح نصه



هناك 20 تعليقًا:

Nasimlibya `√ يقول...

و اخيرا رجعنا للعامية عدتي والعود احمد


المهم اللي تبيه صار وقت قصير طويل مهم البرنامج تحمل تهانينا


ربي يصبر اختك وخلاص صارت معاي بس للاسف العكس مع حاجة غالية ومن اول يوم

بس النتيجة زي بعض
المرات الرخيص في حقه بس لكن عمره اطول من الغالي وعن تجربة

مرة مرة عاوديها بالعامية استاحشناها

سلامات

Meme يقول...

هههههههههههههههه تصدقي و الله قاعده انعاني لا وانا حاليا قريب ننجلط عندي الانتي فايروس نورتن دافعه عليه دم قلبي نحساب روحي بنرتاح طلعلي مره مره يبي ابديت و حجمه 30 ميجا
و شوفي شنو صاير فيا
غضوى جمعه و يا انا يا هو
سلام

siraj يقول...

فعلاً مقيولة الرخيص بخيص ..انا في العادة انكابر وانقول عادي مش التحميل ايطول عادي وراة وراة على قولتك وعندي كل الوقت الحمد لله عازب وهمي في راس غيري وفاضيلك يا نت بس بصراحة القيت في فايدة من ثقلة الخط القيت روحي كان فتحت صفحة من النت انحس بطعمتها ونقراها كلها وكان الخط عك اهو نفتح اكتاب علي الكمبيوتر ونقراة اشوي اشوي القيت روحي مثقف وزادت اهتمماتي بالقراءة وقعدت انقضي في وقت اطول علي الكمبيوتر وابتعدت عن مجالس الغيبة والنميمة لكن تخيلي ان الخط سريع والحياة حلوة تلقي روحك تفتحي في هذى وتنزلي في هذي وكل حاجة تعجبك تنقري عليها واتملي بسرعة من الرفاهية ...ههههههه...يعني رب ضارة نافعة والموضوع مش سيئ واجد ...سلام

may يقول...

عزيزتى فويصلة (( تصغير للفاصلة))

اسمعى ما الاك الا الدى سى ال لكن اصرارك على الموضوع ...عجبنى على الاخر يعنى فى حاجة نتشابهوا فيها كساحة الراس ههههه

اما حكاية البوت والله ضحكت لنه بلحق فصل بايخ وباهى الى درهالها العملة فى الحوش مش فى الشغل ولا فى الشارع ,,,

وخيتك مى وديماااااااا

alfasla يقول...

نسوم

اهلين احني الي بنقولولك عدت والعود احمد ،،،


عن برنامج صراحة خديت فيه مقلب لأن قعد يدير في انستول لقبل مانرقد في الليل مشي سكرته يأست ..في الأخير طلعوا ملفات الصوت مضروبات ..


الصبر وخلاص،،

عن الرخيص عندك الحق ..لكن مش رخيص رخيص يعني في حد المعقول اما خمسه بوت!!


صحيتي على المرور نسيم

alfasla يقول...

ميمي

بعيد السو عليك ان شاء الله في قطوستك انت مش قطوستي اني ...شني تنجلطي على خاطر انتي فايروس ..تعرفي الجهاز بلا انتي فايروس احسن ..تحسي الفيروسات تتدهور على راحتها في الجهاز وماطلعش صوت وتحسي جهاز نظيف ياسلام ,,

لكن لما فيه انتي فايروس يبدا ديما وهو يزمجر فيهم زي الكاسبر ههههه

شن بتقولي هي ربي يصبر ويعطيك ويعطينا صبر صابر

alfasla يقول...

سراج

وجهة نظر والله ..بالحق كان الواحد بيستغل وقت التحميل ولا الطلوع الصفحة مش يقرا كتابات بس... لا يألف مجلدات يخي ...

لكن حتى السرعه باهيه خصوصا لمايكون في حد يتعارك معاك على الجهاز يمشي وقتك كله في مراجيه الصفحات يطلعوا


على قولتك الرخيص بخيص


شكرا اخي سراج على المرور :)

alfasla يقول...

مي


هو التصغير هههه....الدي اس ال ربي يسخره وخلاص المشكله في خيطنا وفي من يعبا ..اما هو احسن وارخص حل ..


شرفينا ديما ميوش

holyday يقول...

سلام عليك
والله ضحكتني لين جنابي وجعوني


امهم
علي قولت جيجيات انا مامسيتش منهم شي
علي عطل كابل لصاير عندنا
ونستخدم تو في نت المدار مش عادي غصبنا علي


اهو يقضي غرض
تسلمي
اختك
فتاة من زمن اخر

غير معرف يقول...

يعطيك الصحة يا هنا على وسعة البال...هوا انا في الأول نحسابك نسيتي فاصلة في نص الرقم..يعني توقعته 1.96 ميجا...لكن مية وستة وتسعين بتنزليهم وبشنو بالمدار؟؟؟؟؟ فعلا يا بنتي اللي يعيش ياما يشوف ههههههههههههههه

حكاية التنزيل هادي مدايرتلنا ازمة في الحوش...مرات يتمو هادوكا السبعة التعيسات..وخوديلك عاد من العراك..كل واحد يقيم ايديه للسما ويقول مش انا..انا ما نزلت شي ولا هوبت جيهة اليوتيوب هههههههههههه ديمةالفاعل مجهول...وعاد ما نحكيلكش كيف خشو بوي وأمي في المعادلة...حاجة ولا في الخيال..كل واحد شادلي اللابتوب في جيهة وتلقيه ينادي يا بنت خيره النت كملتوه والا شنو؟؟ على أساس هما ما ليهمش علاقة بالموضوع نهائي ههههههههههههه

يعطيك الصحة ...وما تحرميناش من المقالات الفلاقية...يعجبوني هلبة

غير معرف يقول...

أهلين هناء ... صباحك سعيد إن شاء الله!

العامية جوها مش عادي ، بس مش عامة للكل ، حتكون صعبه علي الي مايعرفهش ! ع العموم هذا مش موضوعنا ،،،

ماتفكرينيش في سرعة الخط متاع المدار ،،، تعبت منها بجديات . كل مره ننزل للبلاد ونعلق الماك مع شفرة المدار ، نقعد نستني في برنامج الايمال ساعة باش يكمل تحميل كل رسئلي ،،، نقعد غير نقطع و نريش . و طاسه قهوى خاشه و طاسه طالعه ،،،،
نتفكر مره بنوري أمي المدونه متاعي و المواضيع الي فيها قعدت يجي ساعة و نص ،،، لين مشيت لمقهى أنترنت باش غيرت في أعدادات الصفحة متاعي و خليتهم خمس مواضيع ينعرضو في الصفحه الرئيسيه ! و مع هذا مزال يعطل هاهاها , خلي برنامج الايمال ( المشابه للأوت لوك بس علي الماك ) باش حملي الايمالات متاعات نخلي فيه يحمل من الصبح و نجي نشوفهم في الليل هاهاهاها أبدااااع بجديات!

بالمناسبه ! أني مخرووووم ( مش عارف الكلمه هذي حلوه ولالا ) أحذية ! و نجهز في موضوع علي الاحذيه الي عندي في الحوش ...
تعرفي لما نمشي ندير دوره في أي مكان لاااازم نروح بكندرة ولا ندير دوره علي محلات الاحذيه ... مش عارف خير قصتي معاها العادة البايخه هذي هاهاها
و المصيبه مش هني ،، أحذيتي كلها أقل سعر 150 يورو ،،، يعني كان نمشي حفيان راهو راكب سيارة بورشا ولا فيراري هاهاها واحد يبالغ شويه هاهاها
وخايف ننزل هالموضوع نحصل شويه مسح من الشباب ،، متاع واحد يتجعد علينا بأحذيته و كنادرة وشباشبه ولا شنو ؟؟؟ مع أن القصد شريف والله!

عندي حاجه ديما نقول فيها لأمي ،،، الواحد قداش بيعيش عمر باش يلبس حاجه مقلدة و لا غير أصليه ؟؟؟ علاش تحرم في نفسك وتمتعها شويه بكنيدرة شيك , جكت سامبل , بارفيوم راقي , م الاخير أني ندلع في روحي و مانستخصرش فيها حاجه ،، قاعده حتفلس بيا هاهاهاها


يالله سلامات

alfasla يقول...

اهلين بأختي الي من زمن اخر ،،

باهي ان شاء الله دوم الضحكه مش يوم

غير فكينا من جنابك غير مانوحل في المعاينه :)

والمدار كان فيه ميزه ان يفي بالغرض بس بالحق!

صحيتي على المرور

alfasla يقول...

ليبيه،،


هههههه ضحكيتيني والله فكرتيني في خوي هداكا شادها علي نت الريفي وهو استهلاكه غريب فيه والحكاية كرت عشره تعرفي ..المهم اول مايكمل يجينيا في دارنا ومعقرش وجه ويقول (مسرع كملتوه الرصيد)توا هو كان لحقتي معاها على ساعه بوك باشا

لكن خليتهاله واسعه وعريضه شريت لابتوب وعلقته على المدار زي ماتعرفي

وخليتله ورقه على الديسكتوب مفادها (اللابتوب في عين امه ديسك توب)

alfasla يقول...

انس ،،

خليني نبدا بالمقلوب على سيرة الي تقول فيه لأمك

( الواحد قداش بيعيش عمر باش يلبس حاجه مقلدة و لا غير أصليه ؟؟)

علاش يعني لو لبست حاجه مقلده اني مش عايشه !! باهي وكان شريت كندره اصليه بشبح قداش يورو وطلعت صغيره عليا وضربتني شني يعني المتعه الي فيها هادي !

يعني الرفاهيه اهني في ان الناس يشبحوا فيا لابسه كندره غاليه والماركه باينه فيها ولا لأني مرتاحه فيها ؟..

لأن الجماليه مرات تتوفر في حاجه رخيصه غير الرخيص عيبه مايعيشش ..

من ناحيتي اخر حاجه نحط فيها فلوس هلبه الكندره يعني تكون في حدود المعقول مش رخصيه هلبه ولا غاليه هلبه ..والمهم تكون جديده ونظيفه ..


حق الواحد مايستخصرش في روحه ويكون انيق ومرتب لكن مش معناها نشري الأصلي بس ..خلي نديرو حسبه، معناها كان واحد عاش 70 عام ومايلبسش الا في كندرة 150 يورو والله مال قارون ماهو ساده!

لأن الكندره هادي اقل حاجه في لبسه وكل شئ عنده شوف الباقي.. والي بياخده على اصوله يديره كله اصلي ولا لا ،،



عالعموم نراجو في موضوع الكنادر

اني شخصيا نبي نلقي عليهم نظره:)

غير معرف يقول...

أها توى بنبدو في النقاش متاع الحاجه الاصليه والمقلدة ،،،

أهو نقولك يا هناء علاش مانشريش إلا الاصلي ،،، أولا حقوق الطبع و التصميم و الابداع الخ الخ قبل كنت زيي زي غيري يحلل في السرقه بكل أنوعها ( برامج مخنوبه و كراكات ) لين مره قلت لواحد صاحبي معاي في العمل تي علاش تشري في البرامج هونا الكراكات معبية النت ( شافلي من فوق لي لوطا و قالي خناب ) تعرفي الكلمه حرقتني بجديات ،،، روحت قعدت نفكر في الموضوع من كل جوانبه ولقيت عنده حق ... فأتبعت الموضوع هذا حتى في البرامج الي عندي ...
نرجعو لموضوع اللبس و الاحذيه ،،، لو تصير أي حاجه لكندره من كنادري ( عيوب تصنيع أو تصميم ) نرجع للمحل نتعارك معاه و يعطيني وحده جديده من غير مايحل فمه ( خوفا علي سمعة الماركة متاعهم و حفاظا علي زبائنهم طبعا ) لاكن لو شريتي كندره من شارع الرشيد بخمسه عشرة حتى خمسين دينار و بعد سنه ( علاش نبعدو بعيد بعد أسبوع واحد بس ) تقطعت ولا فتحت فمها ،،، ترجعي للمحل يرجعهاله مثلا؟ تي والله ماهو عارفك و تلاقي اليافطة الي تقهر معلقة في راس المحل ( البضاعة التي تباع لا تستبدل ولا تسترد ) ... ليش لانها مقلدة وماحدش يضمنهالك أصلا!!!! إن شاء الله وصلاتك المعلومه بس .

من ناحية الراحه حتى هي ،، رجليا مايستريحوش غير في الماركات الراقيه من الاخير هاهاهاها مع العلم أن عندي أحذيه و شباشبه ماهيش غاليه هلبه و مستريح معاهم بشكل غير عادي ،،، لاكن الحق والله القوتشي و البراذا ماعندك ماتقولي فيهم ( أناقه و تعيش معاك العمر كله ) ... ليش ندفع عشرة ولا عشرين دينار علي كندرة تقعد أقل من أسبوع و نشري وحده جديدة و علي هذا الموال نلاقي روحي صارف أكثر من حق كندرة أصليه و تعيش معاي ثلاث أربع خمس سنوات بالراحة ،،،،

الموضوع محتاج نقاش مطول عندك نيه تناقشي ؟

alfasla يقول...

غير خلي المقارنة متساوية شويه يعني ماتحطش قوتشي وبراذا بحدا شارع الرشيد!

هكي عاد معاش عندنا حق نتكلموا..احني ندوا على البضاعه المعقوله الي في المحلات المعروفه ..ومش غالية برضوا ..

ومعروف ان حاجه الماركة تعيش وديما تبدا جديده مني يقول لا ،،

لكن اني نفضل حاجه زي هادي نشريها في حاجه تستحقها يعني تشري بالطو غالي مش خساره فيه بدلة اكيد..لكن كندره اني قاعده علي رأيي

فهل هي تستحق ام لا ؟!

ماهو على حسب الشئ وتقديرك ليه ..كندرة العشرين والخمسين تعيشلك عام والثانيه تعيشلك اربعه هذا الفرق ...واني نلبس في كندره اربعه سنين علاش حتى التجديد مليح؟!

بعدين دوة اني نمشي لمحل ونقوله كندرتني صارتلها حاجه بدلهالي واهني في ليبيا ..كان ماجاش الكعب في عيني مانوليش هناء ماركه ولا غيرها ..

اما البرامج لا هادي فيها وجهة نظر
لأن فيها حقوق ملكية.. والخ

وكله ماشي في النت بطرق غير مشروعه وفي اقبال على البرامج هادي لأن الحصول عليها ساهل وبالبلاش وماتقدرش تمنعها لأن مش ديما تقدر تمشي وتشري البرنامج المعين مرات في حاجه تحتاجلها توا وتبي تخدم بيها.. ..اهني الي خنبها ونزلها هو الي يتحمل المسؤليه وهو الخانب يعتبر ..
لا يشبحلي من فوق لي لوطا لا سو..

المهم اكيد كل واحد قاعد على رايه فينا ..غير شيطت ريقي وخلاص ..شوية اميه بالله

غير معرف يقول...

سلام
هو صح انا تعليقى متاخر بس انى جديد ع الصراكة المهم
احنى عندنا متل تانى اقول الرخيص بخيص
والزوالى يتعشا مرتين ههههههههههه
يلا باى وياريت تزورينى

zuhare Tabet يقول...

راهو مش كل شيئ غالي معناها كويس لازم تركزي شوية لأن فيه حاجات يبهرك غلاها وحتى هي تلوحي نصها ومرات كلها .

وبعدين توا انت مشتركة في الانترنت متع المدار وعابية تبي اتديري download !

المفروض لو تبي ال download القوي تشتركي في الليبيانا

;)

alfasla يقول...

angel

أهلا بيك ..ولو المكان مكانكم .
قصة العشي هادي زي الي سامعتها قبل لكن مش زي الي كتبتها بالضبط توى نعصر دماغي وانطلعها

اهلا بزياتك الاولى للمدونه وأن شاء الله حنزور مدونتك عن قريب

alfasla يقول...

زهير الثابت
--------
اووه ليبيانا ماعندنا مانقولوا فيها كيف عاد..الجماعه فتحينها علينا رصيد بلوشي وتحميل يابلاش.

زرده *_^

Share/Save/Bookmark