بطاقة تعريف.....

صورتي
حين وقفت بباب التدوين فتش أحلامي الحراس أمروني أن أكتب يومي وأنثر ثنايا الاحساس أمروني أن أرسم فاصلتي بأخر بقايا الانفاس

الأربعاء، 1 أكتوبر 2008

عيد سعيد ..وعمر مديد..ومن القضيا مرتاحين







السلام عليكم


كل عام وانتم بخير ياأصحاب المجتمع التدويني من العايدين الفايزين ان شاء الله

اكيد جاية متاخره مش مشكله لكن عندي ظرف اسئثنائي توا نقوللكم عليه بعدين

وعلاش بعدين خلي نقوللكم عليه توا ولا خلي تقوللكم عليه عظامي المدقدقات نحس في كل عظمه تعيط بروحها

ياناري عليا ..علاش؟؟! من هم تخميل الحوش ..

ماهي الحكاية تلاقت تخميل للعيد وتخميل لعرس اختي الي بعد اسبوع ان شاء الله

عقباليكم يابنيات ...

اليوم يدينا بداري اني واختي وماخفي كان اعظم طلعي الأثاث والبساطات وحطي البساطات الجدد اييييه زرده

ومازل شقا الحلاوات امالا شني مقروض غريبه كعك مالح كعك حلو كعك بالتمر كعك بلا تمر كعك ملبس كعك مش ملبس ..غير الحمد لله فلفصنا من ديران البقلاوه العام هذا الحمد لله ..ربي يخلينا اندير ههه

المهم اعتقد والله اعلم حنطلع من العرس بقايا انسان

حنكتب سهم في جبهتي للوطه (هادي بنادما انتبه هههه)

لأني مش حنبان اكيد هداكا التاو ههه


المهم ان شاء الله كل عام حايين وعيدو عاد على خويلاتكم واميماتكم وعميماتكم

والبسو وهشهشوا يابنيات ..نعرفه الجو هادا احلى حاجه في العيد

وماتنسوش تحافظوا على الشحنه الآيمانيه الي خديتوها من رمضان ومافيش احسن من صيام السكادات

حافظو على قراية على الأقل حزب من القرآن ان شاء الله ربع المهم ماتسكروشي المصحف خلاص

راهو رب رمضان هو رب الشهور كلها وننصح روحي قبلكم بالكلام هادا

وان شاء الله ربي يتقبل بس ..ويعيينا على رواحنا


بالسلامه

هناك 20 تعليقًا:

romansy يقول...

يسعدنى ويشرفنى ان اكون صاحب اول تعليق فى هذا الموضوع
كل عام وانتى بخير عيد سعيد على احلى احساس
واجمل تهنئه من مصر الحبيبه الى اختك بمناسبه العرس الكريم كل سنه واهل لبيبا كلهم بخير وسلام

بصراحه مدونتك مدونه رقيقه جدا
بس انا نفسى فى حاجه
نفسى ادق الكحك اليبى هو زى المصرى كده ولا احسن
عموما نفسى
كل سنه وانتى طيبه

غير معرف يقول...

كل سنه و أنت بألف خير و صحه وسلامه يارب ... وعقبالك حتى أنت باقي خواتك يديرولك أكثر من الي درتيه لأختك ،،،،


ربي يهنيها و يسعدها ( أختك ) و يبعثلك حظك و نصيبك من ولد حلال يعرف ربي ويخافه فيك ,,,

وكل سنه وأنت بألف خير و الحمدوله علي سلامتك و سلامتك عظامك يارب ،،،


سلام

may يقول...

كل عام وانت بصحه وسلامه .. وان شاء الله العام الجديد نشوفوك عروسه يارب يا هنوا,,

alfasla يقول...

رومنسي

اهلين وكل عام وانت بخير وتسلم على كلامك الجميل وعلى مباركتك

فكرتني في الكحك قبل رمضان تكلمت كثير مع عمو علي المصري الي بيشتغل معانا
على الكحك بتعكم قلي انكم بتخدوا الكحك وترشو فوقيه السكر والملبن بيكون داخله حكالي كثير عن الحلويات الي بتعملوها
احنا بقا عندنا كعك المالح ده بيبقى كبير وبنعملوه تزيين بالموس او السكين بيبقى زي الورده ..
والحلو الكعك يعني لو مش في الماكينه بيكون عادي
دائرة يعني بس جميل جدا احنا بنقول مهسهس يعني خفيف ..
شوف اي حد ليبي عندكوا في مصر وقولوا يعملهولك
بس في العيد احنا الطربلسيه اكثر حاجه بنعمل البكلاوة في البيت ده يوم التعب العالمي..
وطبعاً المقروض الكل بيعملوا والغريبه
وان شاء كل عام والكل بألف صحة وسلامه

alfasla يقول...

انس

اهلا وسهلاً وصحيت على المباركه وعقباليك حتى انت وتلقى بنيت الحلال

ويعطيهم ربي خواتي مايديروليش الي درتهولهم ..ايه امالا شن سلم واستلم

المهم كل عام والجميع بألف خير ومن العايدين الفايزين ان شاء الله

بالسلامه

alfasla يقول...

مي

اهلا اهلا كل عام وانت بخير

ان اشاء الله حتى انت نشوفوك عروسه ونصوروا جمبك في التخت ..غير اعزيمنا بس
اني ونسيم ليبيا خلي نهيجولك فيه

هي كل عام وانت بخير

سلامات

a_akak يقول...

أولا شىء ... كل عام و أنت بخير و عايدين فايزين

تانيا ... مشاء الله المدونة حلوة و نتمنى أن أنشوف المزيد :)

فى أمان الله

غير معرف يقول...

كل عام وانتِ بخير,,مدونتك خفيفة الظل ربي يهني اختك والف مبروك ليها وعقبالك.

Herr Esharif يقول...

ونقول وين الابله هناء مختفيه باهى باهى بارك الله فيك ومنوره ما قصرتيش فى رمضان شكلك من الفئه اللى يتكلم عليها الغناى هلبه مافى حد يعاون فيها من خوتها ... كل سنه وانتى طيبه فاصلتنا وان شاء الله عرس اختك يمشى على خير اسئلنى انى على عرس البنات احرف من عرس الولد بمية مره بس يلا ربى معاك ... ما طوليش الغيبه وماتنسيش تعزمى بنات التدوين زى نسيم ليبيا متلا ههههه عارفها مش حتتواضع وتجيكـ ههههه...سلام

نورانة يقول...

السلام عليكم ورحمة الله وبركاته
كل سنة وأنتي والاسرة الكريمة بكل يا رب
ويا رب العام المقبل نكون بنبارك لك كما نبارك لأختك بارك الله لهما وعليهما وجمع بينهما في خير...
هنااااااااااا عايزة كورس ليبي مالييش دعوة على فكرة حاولت أفتح الاذاعة الليبية مش راضية تفتح معايا عااااااااااا......
كل سنة وأنتي طيبة يا قمر وماتحرمش منك ولا من صداقتك الجميلة

alfasla يقول...

عبد الله الشريف

مختفية ؟مازال الخير قدام
اما من ناحية الفئه الي تدوي عليها الخوت ولا
فينطبق عليهم المثل الي يقول لا منهم ولا...ولا بلاش
كمولوها بروحكم

نسيم عازمتها من قبل وتعرف حتى الصاله وين
هي شني نسوم ههه
المهم الله يبارك فيك
وعيد سعيد

alfasla يقول...

نورانه

اهلا اهلا كل سنة وانت طيبه
ميرسي على مباركتك الغاليه
عقبالك ياقمر


اما كورس الليبي فما عليك الا تيجي هنا في لييبا وتبقى تمام
كل المصريين الي هنا بيقولوا ان اللهجه الليبيه سهله جدا
انت شرفينيا بس
اما الأذاعه الليبيه مش عارفه ليه جربي مرة ثانيه ممكن تفتح
انا مجرباها قبل وماشي حلها
حاولي كده مرة ثانية

Nasimlibya `√ يقول...

و انتي بالف خير يا حبوبة رغم اني عيدت عليك بس قلت ياله مش خسارة فيها ثاني وثالت ورابع
ربي يهنيكم ويتمم ع خير يارب وعقبالك

غير معرف يقول...

مدونتك جميلة التصميم ومميزة ,سعيد أني صادفتها .
كل العام وانت بخير

مهيار يقول...

أولا تقبل الله منك صيامك
ثانيا عيد مبارك سعيد

ثالثا هنيئا لأختتك إكمال نصف الدين و إن شاء الله العاقبة لك

ثالثا هناء يا بخيلة مش مشكل التحميل نعرفك قدها وقدود

alfasla يقول...

نسيم ليبيا

وانت طيبه يارب ثالث وخامس

الله يبارك فيك وعقبالك حتى انت ان شاء الله

alfasla يقول...

نزار

اهلا بك وسعيده انا ايضاً بتواجدك

وكل عام وانت بألف خير معيدين فايزين ان شاء الله

alfasla يقول...

مهيار

اهلا اهلا ماكل هذه الغيبه..تقبل الله منا ومنكم بإذن الله

عيد سعيد ..

لم يعد هناك مجالاً للبخل ..الأعمال على قدم وساق

باركك الله

غير معرف يقول...

كل عام وانتي بخير ... والف مبروك على زواج اختك وان شاء الله ربي يتمم على خير ..



:)

غير معرف يقول...

ليبيا ضحية عملية نصب عالمية

الطاقة النووية السلمية أصبح موضوع قديم عفى عليه الزمن ومحفوف بالمخاطرومعظم الدول المتقدمة بدأت تستعمل بدائل أخرى سلمية للطاقة أقل تكلفة وأقل خطرا وتحقق نفس النتائج.
الطاقة النووية وحتى السلمية منها لها مخاطرعلى المدى القصيروالطويل منها أنه لايوجد حل معقول للتخلص من النفايات النووية .. اذا تخلصنا منها فى البحر أو فى أعماق التربة فهى ستسمم المحاصيل والاسماك .. واذا حدث لاقدر الله زلازال وانفجرت المحطة فهذا انفجار نووى كامل .. أما اذا أخطأ عامل فالخطورة قائمة وهناك حادثة "ثرى ميل ايلاند" بالولايات المتحدة و" تشرنوبل " فى أوكرانيا بسبب التقصير البشرى.. هذا بالاضافة الى ارتفاع نسبة الاصابة بسرطان الدم للبشر المقيم قرب المحطات النووية " طبقا للتقارير البريطانية والألمانية".
ارجو من كل من يقراء هذا ان يزور ( مقالات النووى .. كمان وكمان !!- كارت أحمر - كارت أخضر ) فى هذا الرابط:

http://www.ouregypt.us/culture/main.html

Share/Save/Bookmark