بطاقة تعريف.....

صورتي
حين وقفت بباب التدوين فتش أحلامي الحراس أمروني أن أكتب يومي وأنثر ثنايا الاحساس أمروني أن أرسم فاصلتي بأخر بقايا الانفاس

الأربعاء، 6 أغسطس 2008

حل الواجب ..وكل واحد يخش باش يشوف واجبه



السلام على من هنا

اولا سأشكر الغاليه نورانه على تمرير الواجب لي (على الرغم انني امقت الواجبات جدا )
لكن الله غالب وراي وراي ..

بالله خلوني نتكلم ليبي مانيش عارفه علاش مش راكبه معاي الفصحه اليوم معليشي يانورانه مش حتفهميني ..لكن حساب المترجم عليا ابعتي الفاتوره على حساب رقم 000000

نبدو في اول سؤال :

س : أذكر 6 أسرار قد لا يكتشفها من يقابلك أول مرة..:

6 مره واحده باه

اول سر : ان مافيش حد يتوقع من شكلي اني مفجوعه هههه يعني شكلي يدل على اني نمله تاكل مش بنادمه لكن لما بشوف ماكلتي ...
نحكيلكم على موقف مره في الخدمه اتفقنا نشروا ماكينه توست وفرنيلوا ..الفرنيلوا ماصارش منا قلنا بكشي الحكاية تنقلبنا تبكبيك واحني مش نافصين هكي ومطلعين اشاعات علينا من صنة الماكله الي طالعه من مكتبنا ديما ..

المهم لما شرينا الماكينه كل واحده دارتلي روحها دليكاتي وتاكل بالواحده ..مساكين انخلعوا لما روني نطبق وناكل هههه لكن علعموم ولوَ زي حتى هما ..المضحك في الحكاية لما يخشوا الجماعه من برا ويبدو يعلقوا شن فاتحين محل زفنز اهني ..وكان تبيها باهي كان في ضيوف للمدير ..يالا اهم حاجه نشبعوا

ثاني سر : هلبه يقولولي ان لساني طويل شويه مانيش عارفه منين جايبين الدوا هادي ..الي يقولي اللسان برا والكراره داخل والي يقولي انت كلك لسان ...شن بندير هي ديما مظلومه ..

ثالث سر :بعد الناس مايعرفوني ويعاشروني يقولوا عليا اني مرحه (ماريتلي ) اخر مره مديرتي قالتلي اني ماليكتي خفيفه ولو اني نعرف ان هادي الدوا تنقال على البيبهات لكن مش مشكله ..نعمه ...

رابع سر : قاعدين في الرابع اييييه هلبه..المهم ناس مايتوقعوش مني اني نقدر نفتح حوار معاهم لوين مايبو يوصلوا هما خصوصا في عيلتي لحد امس لما جي خالي كنا نتناقشوا في موضوع.. قبلها (قبل النقاش) قالوله تعالي كلمها( الي هي اني) واقنعها (..موضوع مادخلكمش فيه من الأخير ) مشي قاللهم لا هناء ماعندبش دوا معاها ..لكن لما جيتا سكَته ..في الأخير قاللهم هناء هكي ها ..تعرفوا علامه ميه ميه من الصبع الكبير في الأيد مش في الرجل ..

السر الخامس : ان الناس ديما يتخايلوا فيا علي نياتي ...علي خاطر مرات نحب نفوت وندير في روحي مانندريش علي يديروا فيه ..خليهم يفكروا زي مايبوا

السر السادس .: ان مافيش سر سادس ..

1. أذكر اسم من طلب منك حل هذا الواجب

نورانه العزيزه ..بصراحه اخلص صديقه مرت عليا ..من نوعية الناس الي يحبوك ويخلصولك من غير اي مقابل
ناس تعرف وتقدر شن معناها كلمة صداقة ..

2. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.

اكيد حنحولها لصديقتي العزيزه نسيم ليبيا http://nasimlibya1.blogspot.com/

ولزميل التدوين ومبدع الكلمات مهيار http://hamassatadabia.blogspot.com/

وصاحب القضيه الشائكه جاد 365 http://jad.afkar.com.ly/

و طارق سياله http://tarksiala.blogspot.com/

واكيد لعبد الله الشريف http://abdullahalshrief.blogspot.com/

وللعزيزه weda
http://weda4all.blogspot.com/

اه قبل لا ننسى قوانين الواجب:
1. أذكر اسم من طلب منك حل هذا الواجب
2. أذكر القوانين المتعلقة بهذا الواجب
3. تحدث عن ستة أسرار قد لا يكتشفها من يقابلك للمرة الأولى.
.4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.
5. اترك تعليق في مدونة من حولت الواجب عليهم، ليعلموا عن هذا الواجب

..


واخيرا كملت ..

بالسلامه ..

هناك 16 تعليقًا:

Nasimlibya `√ يقول...

اممممم مصدقتش اني الاولي في الواجب بس قولي علاش علاااااااااااااااش
اني فت مرحلة الواجب من زمااااان
علي العموم مشكورة لانك تفكرتيني الاولي بس المرة الجاية تفكريني في حاجة تانية مش في الواجب اوك هناء
وبعدين شن قصة الاسرار للنشر!!!!!!!!!!!
اممممممم هذا يبي تفكير وتدبير قبل الرد

alfasla يقول...

ههههههههه عجبتني كلمة علاش علااااااااااش فكرتيني في روحي لما نكون مفروسه ..باهي هي حلي ماما هي خير مانجيك بالعصا توا ..
غيض المدرسات الي قروني كلهم نفشهم فيك هههههه

نبصر عليك ..فضفضي فضفضي نسمعوا فيك
فكري ودبري

Ruwida Ashour يقول...

السلام عليكم شكرا لانك عبرتيني ولو بامتحان بارك الله فيك
اما عن الاسرار فهي ...
1-بالي واسع........مستعدة نكمل يوم كامل وانا نساير في عيال صغار مهابيل

2-النسيان...انا شخص نشوفه مرة وحدة مستحيل نتذكرة...نحاول نتذكر لكن ننسى فغالبا ما نمشي روحي معاه ونحاول نستدرجة في الكلام لين نخليه هو اللي يعترف من هو ..."ذكاء اجتماعي "

3-مانحبش نشيل من حد...بجد هذي ممكن احسن ميزة عندي..فاي حد يدير لي حاجة ندير روحي لالا انا اللي غلطت وفهمته خطأ.. ونضرب العباطة ونفوت الموضوع مانحبش م الاخير سواد القلوب

4-حاصلة في روحي ...كل حد نتعرف عليه جديد يقولي هالجملةانا للاسف مش هكي بس انا ما نحبش نكون مهزلة ونحب نحافظ علي روحي بس مش درجة "معصية"

5-انا مستوههة ويحسابوني مسيطرة..واجدين عندهم علياهالنظرةديما يفكرو فيا كاني نسرق في الجو منهم وكاني المسيطرة حتى علي صحباتي منين جايتهم هالفكرة مش عارف مع اني مانحبش الجو هذا بكل ...يلا
ديما يحسابوني هبلة....واجدين يديرولي في مواقف كل مرة ويحسابوني لاني نفوت في بعض الحاجات فانا هبلة انا فاهمة كل حاجة بس ندير في روحي مرات مش فاهمة (نكسر في الشر)

6-واجدين يحسابوني من الناس اللي تحب تحافظ علي برستيجيهاو هدوئهاوكنك لقتيني مقمعزة وساكتة"نادرا ما يصير" اعرف ناي مش منسجمة او مازلت متحشمة لاني مانسكت بكل كان دويت ....


وشكرا ياهناعلي هالواجب ليا زمان ع الواجبات

alfasla يقول...

بالك واسع !! باهي امالا احنا مش صاحبات ههههه لأن بالي ضيق علي قد ماتقولي بالي ضيق (مش عارفه تجي كلمة بالي ضيق ولا لا )

لكن تصدقي كلامك علي روحك حسسنا ان في تشابه هلبه من شخصيتك الي طالعه في النت او في المدونة ..لكن نقاطك مستوفيه عليك
وباين عليك شخصيه قويه ماشاء الله
ونحس فيك من الشرق من كلمات قلتيها في ردك صح ولا؟


لكن تعرفي شن بديري توا من قوانين الواجب ان كل واحد يحط ردة في مدونته

ويكمل كل الأسئله الي لطشتdها اوكي ههه

هي بري حطي ردك غادي مرة ثانية خل نحطلك درجتك

غير معرف يقول...

يا ودي شكل طلبتك كلهم كسولين و متحشمين,, ثاني حاجة تي هما لو انتشروا مش رح يكونوا أسرار يعني كان أقل وقع عليهم لو قلتي صفات..

alfasla يقول...

باهي شن رايك نعطيك وجهة نظر ثانية للموضوع .

الأسرار الي نتكلموا عليها اهني المقصود بيها الحاجات الي ماتنقالش باللسان لكن الناس الثانية تلاحظها بطريقة لا شعورية منه من غير ماهو يكون قاصد انه ايوريها .. واكيد كل شخص عنده الصفات هادي .. ونوافقك انها صفات اقرب منها للأسرار لكن لانها صفات مستترة ماتبانش علي طول كانت كلمة اسرار مش بعيده هلبه عل الموضوع .

توى الي مازال ماحلش الواجب يوتي روحة للكعك ..

Herr Esharif يقول...

تى اخ منك وخلاص يا هناء ما قالولكش انى ندخل م الهاتف وماعنديش بى سى بس ماعلينا بنحاول نجاوب بس مافهمتش الجواب هنا ولا ف مدونتى !!

alfasla يقول...

اييييه بصراحه ماخطرش علي بالي انك تخش من الموبايل ..عادي مش حيعفيك هذا من حل واجب وفي مدونتك مش اهني.. ابله مسمومه من الأخير

نورانة يقول...

هنا الرائعة ...احبك في الله
احبك في الله
احبك في الله
رجعالك تاني بس باحجز مكاني يا قمر

alfasla يقول...

احبك الله الذي احببتني فيه
ليك احلى مكان ياقمر ..
بس انت تعالي بس

نورانة يقول...

اولا باعتذر عن التأخير في الرد لظروف خارجة عن أرادتي
هنا بجد اسرارك توحفة قوي ..ما تقوليش لحد بس الظاهر أن السر الاول ده مش عندك لوحدك...ههههههه
على فكرة الليبي على صعوبة فهمه بالنسبة لي بس هو أنسب لغة أن الواحد يتكلم عن نفسه لغته العامية وخلاص انا لما الاقي مترجم هاخليه يبعتلك الحساب ههههه...اسرارك خالية من العقد النفسية المكبوتة بتقول انك شخصية خفيفة الظل جمالها وتميزها في تبسيطها للامور ...برغم أنك بتبسطيها في قالب فلسفي يمكن عشان كده ماحدش بيغلبك في الكلام ههههههه
هنا باحبك في الله وسعيدة جدا جدا جدا بمعرفتك وصداقتك الغالين على قلبي جدا بارك الله فيك يا قمر

Herr Esharif يقول...

تى خيرك يا أبلتنا صفى النيه والله بجد ماعندى بى سى وكافى نت ماعنديش وقت نمشيله بس مع هذا رح نجاوبه مش زى نسيم اللى شادتها عناد وقالت مش حنجاوبه لين تجاوبه انتا مع انها مش مخليه مدونه الا راده عليها ههههه مانحبش الايبارى اشاعات راهو بس هذا اللى صار وع فكره ديرى لروحك ايميل ياردى الشات بوكس معاش عرفنا نوصلو فيك ... سلام

alfasla يقول...

نورانه العزيزه ازيك عامله ايه
تعرفي لي مده عايزه اعقب عليك بس النت البيت خالص والشغل كذلك حاولت الاقي شبكة الجيران مش راضيه تعلق ابداً

المهم ميرسي على ردك ياقمر ..وجميل انك
اكتشفتي فيا حبي لتبسيط الأمور تعرفي مابحبش حتى اتعامل مع الناس المعقده الي بتعمل الف حساب للكلمه ..بحب الناس الي يبقه بقها على الهواء مباشرة
يعني كلمه توصل للمخ بتتقال مافيش حاجز ليها ..يعني ده بيعملي مشاكل جامده للأسف ..بس يعني الي عجبوا اوكي الي مش عجبه اهي طرابلس فيها شط كبير جدا ..يبقى يمشي ياخدلوا بقين منها هههه

سعيده بردك حبيبتي ربنا مايحرمنيش من طلتك

alfasla يقول...

لا مش حتنفع الأيباري بيني وبين نسيم ليبيا .. خليها ادير اي حاجه عندها الضو الأخضر ...وبنحطلها فول مارك من غير حتى ماتجاوب ..هادي (الواسطه)يقولولها..

والي يبي يوصل فيا اهي المواضيع مفتوحه
خدمتها 24/24 ..وبكشي نرجعه من يدري

Hayam يقول...

شن هو الموضوع لي مدخلناش فيه ؟هههههههههههههه
شعب قصقاص هههههههههه

اصلا مفيش غيره لي ديمة يزنو فيه المالي ولما الأم تعيا في بنتها اول حاجة اضبحلها علي خالها

يا والله حني

كويس والله اننا تعرفنا عليك عن قرب

الواجب مدسوس عندي من زمان شكلي بنحله في رمضان بما انها فترة مسابقات وحلول الغاز ;)

سلامي

alfasla يقول...

يوما اهلين بيك عزيزتي

اك طلعتي تفهمي اوكي حني شعب قصقاص لكن نفهموها علي الطاير ..في قراية الخنس مايوصوناش هههه

شن بتخليه لرمضان يعطيك الصحه والله
غير كان حليتي بس باهي مش زي البخليين الثانيين

سعيده بمرورك اللطيف يوما

سلام

Share/Save/Bookmark