بطاقة تعريف.....

صورتي
حين وقفت بباب التدوين فتش أحلامي الحراس أمروني أن أكتب يومي وأنثر ثنايا الاحساس أمروني أن أرسم فاصلتي بأخر بقايا الانفاس

الثلاثاء، 19 أغسطس 2008

غير لوااااااااااه بس ؟؟؟؟؟!


نبي نعرف حاجه ؟! علاش في ناس يحسابوا كان داروا حواجبهم 111
وحسبوا الف حساب باش بس يبتسموا للي قدامهم معناها تبتوا هكي شخصيتهم؟
يعني لازم يحسبها قبل ..
لو فيه الشخص هذا فايده او مصلحته في ايده يوريله سنيناته ..
والثاني يشبحله من فوق للوطه تقولش يدفع فيها من جيبه..
ماسمعش هذا حديث الرسول صلى الله عليه وسلم: (( لاتحقرن من المعروف شيئا ولو ان تلقى اخاك بوجه طلق))
وفي حديث اخر
( ألا اُخبركم بمن تحرم عليه النار غداً، قالوا: بلى يا رسول الله، قال: الهيّن الليّن القريب اللين السهل)
وقال ابن عمر رضي الله عنه:
(إن البر شئ هين وجه طليق ولسان لين)
باهي امالا لاش نحسبولها في الف حساب .
.صدقوني اخرتها بنقعدوا في شبرين وبياكلنا الدود والتراب ..
باهي نقروا قول ثاني لعبدالله بن الحارث رضي الله عنه :
(مارأيت أحدا أكثر تبسما من رسول الله صلي الله عليه وسلم )..
بالكشي الشخص الي نتكلموا عليه في موضوعنا هذا نافع البشريه اكثر من سيد الخلق ..
باهي امالا لواه غمة القلب هادي ..
حاجه ثانيه في ناس كان حسوا ان ربي عطاهم شوية نعمه وفلحوا في مجال معين ..خلاص الخشيم يبدا في السمي حاشاكم
واول شئ عاد يديره يعقدلك حواجبه ..
زعمك علي خاطر المعلومتين الي عنده رزان علي راسه هذا علاش
يعقد في حواجبه يخاف يتشلبكوا ويطلعوا من ودانه ؟؟؟!!..علي راي حاتم الكور ايجوز ..
صدقوا والله جدودنا لما قالوا (شد خبستك واطلق عبستك )..
قداش مايعجبوني الناس الي تلقاها معبيه
وفي نفس الوقت يضحكوا في وجهك ويحسسوك ببنة الحياة معاهم
حاجة ثانيه نلاحظ في شريحة من الناس لما يتقنوا شئ يدسوا الشي هذا ليهم بس .
.يعني يتسمم بالسم كان طلبتي منا يشرحلك الي يدير فيه
مايعرفش الشخص هذا ان المعلومه الي يطلعها لغيره تعتبر صدقه لعمره ..
والله ماننسى كلمة استاذي (كان مدرس انجليزي)
لما سألناه مره علاش توجهت للتدريس
كيف قالنا اني لو نعرف a b c نمشي نشد ولدي الصغير
ونقوله تعال نقريهملك صدقه على الي عطاهولي ربي والي تعلمته ..
وفي عاد النوع الثاني الي البعيده يبدا يراجي فيك غير شن تغلطي
باش يفش غله ويطلع عقده النفسيه كلها فيك ..
تقولي هو مايغلطش ..
المهم باش مانطولش الدوا ..
راهو صدقوني عمرها الشخصيه ماكانت بالتكشير والنفخ ..
والشخص الي تستصغره انت في نفسك ثق واتأكد
ان يقدر يكون خير منك الف مره في المستقبل
وما تخليش الغرور يتسلل لنفسك لأنه مرض خطير والعياذ بالله
شي ثاني خففوا على الناس ماتشدوش هلبا عليهم ..
الكلام هذا نوجهوه خصوصا لأرباب العمل والي بيدهم السُلطه .

هذا ماعندي
بالسلامه


هناك 18 تعليقًا:

مهيار يقول...

محجوز جئت لأسجل الحضور مع وعد بالعودة فقد قرأت الموضوع و أعجبني جدا و قد أضيف تعليقا آخر غير هذا ... صحيح أني أفهم اللهجة الدارجة الليبية لكن غيري قد لا يفهمها أليس كذلك يا هناءءء و لا أخفي عليك الموضوع رائع و يستحق أن يخوض فيه الجميع و لكن كيف لهم ذلك و الكثير منهم لن يفهم مقاصدك :" في ناس كان حسوا ان ربي عطاهم شوية نعمه وفلحوا في مجال معين ..خلاص الخشيم يبدا في السمي حاشاكم
واول شئ عاد يديره يعقدلك حواجبه ..
" رائع هذا الكلام لكن كان الله في عون نورانة حتي تتوصل الى فهم مقاصده

Nasimlibya `√ يقول...

هههههههه غير منو اللي قام خشمه عليك
اكيد معنداش نظر
النموذج اللي تحكي عليه هذا اكيد عنده كرسي وهذا علاش هو شن خلانا هكي الا هو واللي زيه
ميكونش البشمهندس ؟؟؟؟ هيا قولي اما واحد فيهم ؟؟؟؟
خليك نشيطة زي قبل نستنا ف جديدك

alfasla يقول...

مهيار

لقد اضحكني تعليقك ..ولكن لا تخف على نورانه فطنتها اكيد ستدلها على المعنى ..
بعدين خليها تتعلم ليبي شن غير احني نتكلموا مصري ..

بالنسبه للجمله الي بين القوسين يانورانه معناها لو في حد ربي انعم عليه بعلم او تفوق في اي شئ احيانا تلاقيه بقا متعنطس بالمصري ..

لو احتجتني لمترجم ابعثي الفاتوره كما قلت على رقم حساب صفرين ثلاث صفار صفرين

وبانتظار عودتك مهيار لنستفيذ من تجربتك بالتأكيد

alfasla يقول...

نسيم ليبيا اهلين بيك

لكن والله صدق من قال شعب قصقاص اخ منك ...

لكن ممكن نحكوا بصفه عامه ناس تقابليهم في حياتك او تلاحظيهم من خلال معاملتهم مع الناس الثانيه

ومش كله قصة كراسي بالعكس هلبا الي تلقيهم هكي هما ناس عاديه زي خلق ربي

غير الشيطان نافخلهم راسهم حبتين ..

Herr Esharif يقول...

مش عارف من وين نبدأ .... احسن شى الموضوع بالعاميه ولهجتنا مش بهديك الصعوبه ... مصطلح جديد معرفتش معناه حواجبه 111 !! رفعة الخشم مش محصوره بجماعة الكراسى بس لكن صفه للنفوس المريضه والحاسه بالنقص ... اما بخصوص الاحتفاظ بالمعلومه فتعالى عندنا فى الطب حتى اذا سأل الدكتور وقال شكون يعرف "يرزنو" كيف بجيبو من الأوائل كان هذا ... واذا ع الابتسامه صدقينى يا هنو الموضوع هذا خلونى نخنس منه يعنى خوك ديما سنونه ع الشارع "سمايلى" بس اذا اقترن الموضوع بالجنس الاخر يقولك هذا فى باله شى !! وطبعا الكلام مش ع الكل ... الخلاصه ديما فشى غولك ف المدونه خير ما تنفجرى ... سلام

نورانة يقول...

اللهم صلي وسلم عليه وعلى آله وصحبه أجمعين
هنا موضوع بجد جميل جدا عندك حق تعرفي مش عارفة أبدأ التعليق من فين من عند كلامك عن بشاشة وطلاقة الوجه في وجه أحدنا الآخر اللي قعلا بقت ضرورة ناس كتير ماعدتش تتعامل غير بالعبوس كأنه هو اللي هايحل مشاكلها أو أنه هو الاسلوب الرسمي لأثبات علو غير موجود من أصله .......والا من احساسي بالاحراج لأني بصراحة جد جدا معظم الوقت لكني لا أحاول العبوس عند التحدث في وجه أحد ...أو من عند كلامك عن الناس اللي بـ"تدس"العلم تعرفي معلم الانجليزية بتاعك ده عبقري -سؤال جانبي هو ده المدرس بتاع موضوع" جت الحزينة تفرح"اللي كان يحترم مواعيده؟؟؟؟-تعرفي أن في دكتور جاء في برنامج أجنبي كان بيقول أفضل وسيلة للحفاظ على الذاكرة هي نشر العلم أو بمعنى آخر تعلم علم وتعليمه...سبحان الله ...بجد لو بصينا للموضوع على أنه استثمار للآخرة هايتغير وجهة نظرنا كتييييير ....وأخيرا يا هنا موضوع رااااااااااائع وشكرا للأخ مهيار على دعائه لي كنت بحاجة للدعاء وحقيقي هاحاول أتعلم اللهجة الليبية بس هي المشكلة أني باتعلم أسرع بالسمع عن القراءة وحدها بس إن شاء الله أقدر ألم بيهاههههههههههههههه أنا حتى فهمت الجملة اللي بين القوسين ..وفاهمة ال111 هههههه ....بس مش متأكدة إذا كان بالاساس ليبي والا مصري أصله منتشر جدا عندنا ....دمتي بكل خير هنا

alfasla يقول...

عبد الله اهلا بيك

حواجبه 111 معناها لو الواحد عاقد حواجبه كيف بيولو شكلهم ثلاثه خطوط جنب بعضهم زي ال111 ولا..

المهم انت اكدتلي كلامي ربي يصلح الحال وخلاص ..

صحيت على الرد

بالسلامه

alfasla يقول...

Welcome Mr. gorge

First: Thank you for inviting me to your blog

Second: Senior my admiration for collective action

Discrimination: .. the subject interesting and requires a lot of talk

I will reply on this subject as soon as I have time for that, God willing

Thank you again Mr. gorge

alfasla يقول...

نورانه اهلا بيك

اديك فهمتي كل حاجه ماشاء الله عشان يعرفوا بس جمهوري العبقري

كلامك صحيح ومش لاقيه حاجه ازيدها عليه ..

بصراحه ايوه هو نفسه مدرس الإنجليزي بتاع جت الحزينه تفرح دي كلمه ديما بفتكرها ربنا يجازية كل خير ..

بس دي كانت طريقه بنتبعها كثير ايام الجامعه اي حاجه عايزاها تثبت على طول جيبي جروب معاك واديها شرح ..بتثبت بطريقه غريبه يبقى كده اخذتي اجر ومنفعه

وبقي تعالي اتكلم معاك ليبي عشان تتعلمي بسرعه بس كله بفلوسه خلي بالك.. 111 مش عارفه اصلها ايه اول مره اعرف انكم بتقولوها كمان عندكم

ميرسي على ردك ياقمر

سلام

نورانة يقول...

السلام عليكم ....هنا الجميلة في واجب في المدونة بعد إذنك ....
كل سنة وانتي طيبة يا قمر دمت بخير

Herr Esharif يقول...

هلا هنا امشى لمدونتى راهو درت الواجب .. غير كان تردى البوكس بدل ما خلينا الموضوع زى الشات .. يلاسلام

Hiba يقول...

بالطرابلسي خلي نقوللكم
رمضانكم مسعود ومبروك

Nasimlibya `√ يقول...

هنو يا عزيزتي حليت الواجب خلاااااااااااص حليته

alfasla يقول...

نورانه

اهلا بيك وكل سنه وانت بألف صحه وسلامه يارب

اما عن الواجب علم وسينفذ ..بس صبرك عليا ..الدنيا صيام والكسل متفشي اليومين دول ..

بس ححله ياابله ولا يهمك ..بس حتديني اييييييييييييييييه

alfasla يقول...

عبد الله ايه امشيت لمدونتك ورديت قبل حتى مانقرأ ردك هذا ..

لكن كأنك طايرتلك ولا حاجه ..غريبه ماعرفتش علاش

اما تشات بوكس حاضر اني نوازي في شكل باهي بس باش نحطه

alfasla يقول...

LoveLyH

وبالطرابلسي نقولك ان شاء الله كل عام حايين ..
ورمضانكم مسعود مبروك ..

alfasla يقول...

نسيم ليبيا

حليتي الواجب لووووووووووولي

اما طالبه مجتهده بالحق تي شن هذا هلبه هكي على الجمعيه بالشويه كليتي السوق بنشاطتك..

اسمعي اعكسي الكلام ح يمشي عليك ميه ميه هههه

zuhare Tabet يقول...

ايييييييييييييييه
فكرتيني في واحد نعرفه

Share/Save/Bookmark